LAOAG CITY – Inpetteng ni Barangay Chairman Manuel Savellano iti Barangay 53, Rioeng ditoy ciudad ti Laoag a saan a pudno ti alegasyon a nabayag ti panangited na ti barangay clearance.
Segun kenni Savellano, nangala ti clearance da Dr. Marilou Honey Tamayo mainaig iti panangipatakder da a negosyo ken adda ti inbalakad na kadagitoy ken kalpasan daytoy ket saan da a sinublyanan.
Kinontra na pay ti rakurak ni Tamayo nga adda ti maris pulitika ti maipagarop a pannakaitantan ti panagala da ti brangay clearance.
Inlawlawag na pay a saan a pudno a maipagarop a parparigaten na ni Tamayo a makaala ti clearance gapo ta nagkalaban da idi iti eleksyon.
Kunana a pinirmaan na a dagus ti nasao a dokumento idi naiyawat kenkuana.
Kabayatanna, kunana nga adda met ti sumaruno nga addang na kalpasan a maipagarop a nagpost ti doktor iti social media kontra kenkuana.
Immuna iti daytoy, inpakamao ni Dr. Marilou Honey Tamayo, ti kapadasanna seknan iti panagala ti Barangay Clearance iti Brgy. 53-Rioeng ditoy siudad ti Laoag.
Inbatad ni Tamayo nga addan dua a lawas a naitantantan ti pannakaited ti barangay clearance ti asawana babaen ti kapitan iti nasao a barangay.
Gapu iti daytoy, kuna na a nagpost iti social media platform a Facebook nu sadino nga in-tag na pay ti USec. ti DILG.
Nu pay kasta, inbatad na a kalpasan a nagpost ket pinatuludan daytoy ti kapitan ti summon pakairamanan dagiti dadduma pay a kabarangayanna a nangibbat ti komento iti nasao a facebook tag.
Mainaig iti daytoy, inpakaamo ni Dr. Tamayo nga apaman a nagsasango dagitoy iti Barangay, kiniddaw na a maalaan ti video ti panagsasarita da tapno mailawlawag iti kabarangayanda ti rason nu apay a nabayag ti pannakited ti barangay clearance ngem nagkedked ti kapitan ken arigna nagbalin pay nga arogante.
Innayun na a saan a naitultuloy ti nasao a panagsasaritada gapu ta nagbalin a nabara ti komprantasyon kangrunaan na iti biang ti kapitan ken dagiti opisyal ti barangay.
Kuna pay ni Dr. Tamayo a namin-adon a daras ken adon a tawen nga inaramid ti kapitan kadakuada ti nabayag a pannakaited ti barangay clearance nu sadino a ti makitkita na a rason ket gapu ti maris pulitika agsipod ta agpada dagitoy a nagpaidasig kas kapitan idi naudi a panagpipili.
