LAOAG CITY – Inlawlawag ni Dr. Elizer Asuncion, chief of hospital iti Laoag City General Hospital (LCGH) ti alegasyon ti maysa nga ina iti ili ti Vintar a nabaybay-an ti anak na iti ospital rason a pimmusay daytoy.
Segun ken ni Asuncion, idi naitaray ti ubing iti ospital ket addan iti “toxic” a sitwasyon ken adda ti asthma na.
Kuna na a kabaelan ti ospital a mataming a dagus dagiti pasyente ken regular ti pannakakita kadagiti apparatus ti ospital rason a saan a maibaga a perdi dagitoy.
Inlawlawag na a nu man adda dagiti gundaway nga agperdi dagiti apparatus ket saan a mapakadaan daytoy.
Mainaig iti daytoy, inkalintegan ti doktor a ti ibagbaga ti ina a saan nga antibiotic ti agas a naitudok iti anak na ket saan nga agpayso gapu ta salbutamol ti naited ken daytoy ti agas para iti asthma ti ubing.
Innayun na a nataming a dagus ti ubing ken saan a nabayag ti doktor gapu ta agabay laeng ti ICU a nakaipanan ti ubing ken ti emergency room a naggapwan ti doktor.
Maipalagip a nagkamang iti Bombo Radyo ni Mrs. Shearylyn Domingsil Apaguen, ina ti agtawen ti lima nga ubing tapno maipakaamo ti maipagarup a a pannakabaybay-a ti anak na babaen iti LCGH, napakatan ti antibiotic, perdi ti makina a nausar iti pannakasuction ti anak na ken maipagarup a naladaw ti pannangtaming ti doktor rason a pimmusay daytoy.
