LAOAG CITY – Naglikudan ni Brgy. Chairwoman Erlinda Foster iti Brgy. 57-Pila ditoy siudad ti Laoag ti alegasyon a maipagarup a mandatoryo ti panagbayad ti 50 a pisos a kontribusyon dagiti residente para iti pyesta.
Segun ken ni Foster, ti lima a pisos ket boluntaryo ken saan nga inkalipitan a maited.
Kuna na a ti naukkon a pondo ket nausar para iti piyesta ni Sto. Niño iti napalabas a lawas.
Inbatad na a kangrunaan a nakaipanan daytoy ket iti simbaan ken kadagiti nausar iti piyesta.
Inlawlawag na a manipod iti 18,000 a nakolektarda ket 9,000 ti naited iti simbaan ken 9,000 met ti nabati para iti piyesta.
Mainaig iti daytoy, kuna ni Foster a ti pannakaiyuswat ti piyesta ket naipakada met iti DILG ken napalubusan babaen iti pannakasurot ti 50% capacity, panagipresentar ti vaccination card ken pangisuot ti face mask.
Kabayatanna, inbunannag ti kapitan a saanna a masinunuo ti rason nu apay a timpuar ti nasao nga alegasyon.
