LAOAG CITY – Naglikudan ni Brgy. Chairman Florentino Mariano Jr. iti Brgy. Barcelona iti ili ti Solsona ti alegasyon a naidanun iti Bombo Radyo.
Daytoy ket mainaig iti maipagarop a kaadda dagiti nagpositibo ti covid-19 a kabarangayan na nga agwarang-warang latta iti barangay da.
Inbaga ti kapitan a nakordonan aminen dagiti pasilidad nga ayan dagiti nagpositibo ti covid-19 iti barangay da.
Inlawlawag met ti kapitan nga adda ti kapamilya dagiti sumagmamano a nagpositibo a palpalubusan da a mapan agiwayway kadagiti taraken da ngem binalakadan da dagitoy a magna da kadagiti adayo iti balbalay.
Kabayatanna, inpasigurado ti kapitan nga awan pulosen dagiti aggapo iti sabali a barangay ken ili a makastrek iti Barangay da gapu ta maymaysa ti pagruwaran ken pagserkan tapno mabantayan da a naimbag dagiti sumrek ken rumuar.
Innayon na a dagiti mapan agideliver ti magatgatang online ken dadduma pay ket agpatingga da laeng iti barangay hall da ken isu ti papan pangalaan dagiti akin-order.
