LAOAG CITY – Ikagumaan ni Alex Eala a makarugi ti napigsa a kampaniana iti Strasbourg Open no sadinno a makabinnalubalna ti Ukrainian a ni Oleksandra Oliynykova iti opening round ita nga aldaw ti Lunes.
Agbalin a nadagsen iti Filipina tennis star ni Oliynykova, nga agdama nga adda iti world No. 68 iti WTA rankings ken addan ti padasna iti Grand Slam kalpasan ti debut iti Australian Open ita a tawen.
Adda pay ti naiget a clay-court resume kalpasan a nangabak ti tallo a WTA 125 titles iti napalabas a tawen idiay Italy, Argentina ken Chile.
Sakbay nga agturong idiay France, naabak ni Oliynykova kontra ken ni Simona Waltert iti Round of 128 ti Madrid Open.
Kabayatanna, aggapu met ni Alex iti third-round exit iti Italian Open a naabak isuna babaen ti two-time Grand Slam champion Elena Rybakina, 6-4, 6-3.
Ti Strasbourg Open ket agbalin a maikalima a clay-court tournament ni Alex ita a season kalpasan dagiti kampaniana iti Linz, Stuttgart, Madrid ken Rome kabayatan nga agtultuloy nga agsagsagana para iti ay-ayam iti European clay swing.
