LAOAG CITY – Saanen a patawan ti pannusa ti Women’s Tennis Association (WTA) ti Filipina tennis star a ni Alex Eala kalpasan a pinili na nga irepresentar ti Pilipinas iti 20th Asian Games imbes a makipaset ti WTA 1000 China Open.
Inbutaktak daytoy ni Philippine Tennis Association (Philta) Executive Director Tonette Mendoza iti naisayangkat a panagdengngeg ti Senate Committee on Sports.
Obligado koma ni Eala a makipaset iti nasao a kompetisyon iti babaen dagiti pagannurutan ti WTA, no sadinno a mabalin a mapatawan ti $10,000 a multa ken pannakakissay ti ranking points.
Naawatan ti organisasyon ti kalikagom ti atleta ti direkta a makaala ti slot para iti 2028 Los Angeles Olympics.
Nangipasa me WTA kadagiti baro a probisyon a mangipaay ti proteksyon kadagiti umaayam nga agkalikagom nga agserbi iti bukod a pagilian.
Iti agdama, agin-inana paylaeng ni Eala sakbay a makilaban iti WTA 1000 Wuhan Open iti China a maiyuswat mangrugi intono Oktubre 12 agingga iti 18.
