LAOAG CITY – Nangrugin ti lima nga aldaw a mandatory quarantine ni dismissed Bamban, Tarlac Mayor Alice Guo ken dagiti kaduana nga akusado iti Reception and Diagnostic Center (RDC) ti Correctional Institution for Women (CIW) iti ciudad ti Mandaluyong.
Segun iti Bureau of Corrections (BuCor), ti 5-day quarantine ket standard protocol para kadagiti amin a baro a persons deprived of liberty (PDL) iti CIW.
Kabayatan ti nadakamat a panawen, dumalan da Guo, Jaimelyn Santos Cruz ken Rachelle Joan Malonzo Carreon iti naan-anay a medical examination tapno ma-assess ti pisikal a kasasaadda ken masigurado nga awan ti peggad iti salun-at dagiti dadduma a balud.
Kalpasan ti quarantine, maiyakar ti Guo iti regular dormitory a panagtalinaedda iti 55 nga aldaw ken dumalan iti mandatory orientation, diagnostics ken qualification.
Apaman a malpas ti 60 nga aldaw a proseso iti Reception and Diagnostic Center, maipan da Guo iti naituding a quarters da iti Maximum Security Camp, maibasar kadagiti pagannurotan para kadagiti balud a nasentensiaan iti tungpal biag a pannakaibalod.
