LAOAG CITY – Pinilaan ti Department of Justice ti 62 counts ti money laundering cases ni dismissed Bamban,Tarlac Mayor Alice Guo.
Ni Guo ket agdama nga adda iti Pasig City Jail gapu iti kaso a 26 a counts ti panaglabsing iti Anti-Money Laundering Act (AMLA).
Sumangsango pay isuna ti five counts gapu iti panaglabsing iti Section 4 iti kapada a kaso gapu iti panag-convert, panangiyakar ken panaggatang wenno babaen ti instrumeto wenno sanikua.
Karaman pay iti kapada a kaso ti nagannak daytoy nga isuda Jian Zhong Go ken Lin Wenyi pakairamanan dagiti kakabsatna nga isuda Shiela ken Seimen ken 26 a dadduma pay a karaman iti operasionda ti Philippine Offshore Gaming Operators (POGO).
Basar iti 48 a panid a resolusion nga inruar ti Department of Justice panel of prosecutors a dagiti biruk manipud iti Philippine Offshore Gaming Operators iti Baofu compound a kukua ti Guo ket naiyakar kadagiti dadduma a lehitimo a negosio ti pamilia.
Idi tawen 2023 idi ni-raid dagiti otoridad ti Philippine Offshore Gaming Operators iti Baofu compound no sadinno a naarestarda ti 300 a ganggannaet a masansan dagiti Chinese citizen.
Idi Marso 13, 2024 ket naminsan a ni-raid ti nasao a lugar kontra ken ni Zun Yuan gapu iti pannakairamramanna ti labor trafficking, cryptocurrency scams, love scams ken investment fraud.
Kinumpirmaran ni Prosecutor General Richard Anthony Fadullon a naipiladan ti kaso iti Korte iti Capas idinto ti resolution ket nairuar idi Enero.
