LAOAG CITY – Maysa ti natay kalpasan a nagdinnungpar ti kurong-kurong ken jeep iti manila north road bisinidad iti Brgy. Tabug iti siudad ti Batac.
Nabigbig ti biktima a nangituron iti kurong-kurong agtawen ti 40, aglaklako iti aluminum ken residente iti Brgy. Anggapan iti ili ti Currimao idinto a ti nangiturong ti jeep ket agtawen ti 24 ken residente iti probinsya ti Nueva Ecija.
Basar iti imbestigasyon ti PNP-Batac, agpapaamianan a direksyon ti jeep a mapan agideliver kadagiti nateng iti tiendaan idinto nga agpaabagatan a direksyon ti kurong-kurong.
Kabayatanna, naamoan a ti kurong-kurong ket umag-agaw iti linya ken iti gandat na nga umakar iti bangir a linya ket nakasinnabat na ti jeep ken nagdinnungpar dagitoy.
Gapu iti daytoy, nagsagaba ti sugat iti nagduduma a paset ti bagi ti driver ti kurong-kurong kangrunaan iti ulo.
Iti agdama ket nagtalinaed iti kustodyar dagiti otoridad ti driver ti jeep ken maiyur-uray ti desisyon ti pamilya ti natay nu mapilaan daytoy ti reklamo wenno saan.
Naamoan nga adda iti impluwensya ti nasanger ti driver ti kurong-kurong idi napasamak ti insidente.
