LAOAG CITY – Inbinsa-binsa ni Mr. Genaro dela Cruz, mangidadaulo ti Alyansa Dagiti Mannalon iti Ilocos Norte dagiti kalikagom ti grupo na iti panangidaulo ni Presidente Ferdinand Marcos Jr.
Karaman ditoy ti pannakapadur-as ti lokal a produksyon nangruna ket nabayagen a maluglugi dagiti mannalon, ti pannakaipaay ti naan-anay a subsidiya dagiti mannalon ken mangalap, pannakaibaba ti presyo dagiti abuno ken pestisidiyo.
Inbatad na pay a kalikagom da a maipangato ti paggatang ti irik no sadinno ket saan a bumaba ngem 20 a pisos iti kada kilo ken dagiti dadduma a produkto kas iti mais ken tabako, kasta pay ti pannakaibasura ti RA 11203 wenno ti Rice Tarrification Law nga isu ti rason no apay a nababa ti paggatang ti irik dagiti mannalon.
Kalikagom pay ti grupo a masuspenso ti excise tax ken expanded value added tax iti petrolyo nangruna ket nadagsen para kadagiti mannalon ken mangalap ti panagngato ti presyo dagitoy.
Iti biang met ti importasyon, kunana a no saan a maisardeng ket malimitaran ti panagangkat iti nagduduma a produkto a pang-agrikultura gapo ta daytoy ti mangpatpatay iti sektor ti agrikultura, kasta met a maisardeng ti smuggling kadagiti nagduduma a produkto.
Patien pay ni Dela Cruz a no maipasa kas maysa a linteg ti Rice Industry Development Act wenno RIDA ket marisot ti problema iti food sufficiency
Mainaig iti daytoy, kuna ni Dela Cruz a kalikagom pay ti grupo da a maisubli kuma ti saritaan ti kapya wenno peace talks iti nagbaetan ti gobierno ken ti National Democratic Front of the Philippines.
Daytoy ket gapo ta babaen iti daytoy ket masolbar ti ramot iti problema ti pagilyan ken maaddaan ti naan-anay a kapya gapo ta dakkel pay laeng a parikot ti insurhensya wenno rinnupak dagiti agpapada a Pilipino.
