LAOAG CITY – Pormalen a nangipila ti kaso ita nga aldaw ti whistleblower a ni Julie Patidongan wenno alyas “Totoy” iti National Police Commission dagiti 15 a pulis a karaman kadagiti mapukpukaw a mammallot.
Inbatad ni National Police Commission Vice Chairman Rafael Calinisan, innaganan ni Patidongan dagiti 15 a pulis iti insubmitirna nga affidavit a dakkel a tulong tapno marugianen ti pannakairaman dagiti pulis iti kontrobersial a kaso.
Naammoan nga iti baet a kaso administratibo ti sangoen a kaso dagiti pulis, mabalin a makasoan dagitoy ti kaso kriminal basar kadagiti maidatag nga ebidensia.
Manamnama nga aglippas ti imbestigasion iti uneg ti dua a bulan.
Inlawlawag ni Calinisan, nadagsen ti akusasion ni Patidongan no sadinno nga adda dagiti itudtudona a nangangato nga opisial ti Philippine National Police.
Innayonna a ti administrative jurisdiction-da ket para kadagiti aktibo a pulis laeng ken maipagarup nga awan ti kontrolda kadagiti nagretiro a pulis a karaman iti nasao a kaso.
Kabayatanna, no mapaneknekan a guilty iti grave misconduct, posible a mapatawan ti pannakasuspenso wenno dismissal dagiti pulis.
Inpasigurado ni Calinisan a maipatungpal ti due process kadagiti amin a karaman iti kaso.
