LAOAG CITY – Awan ti sabali nga arapaap ni Mr. Joel Cachero no di ket matungpal amin ti arapaap dagiti annakna.
Daytoy ti inibbatanna a sarita kabayatan ti pannaki-uman ti Bombo Radyo Laoag kenkuana kagiddan ti pannakaselebrar ti Father’s Day ita nga aldaw.
Segun ken ni Mr. Cachero a residente iti Brgy. Nagbacalan iti ili ti Paoay a 28 a tawen daytoyen nga agserserbi kas maysa a bus driver nga isu ti kangrunaan a pagbirukanna a nangsupusop kadagiti amin a pagkasapulanda iti panagbiag.
Inbatadna a babaen iti panagtrabahona iti agarup tallo a dekada kas bus driver ti Manila-Laoag ket napagturposnan ti dua kadagiti tallo nga annakna iti Bachelor of Science in Information Technology ken Bachelor of Science in Civil Engineering idinto a manarimaan pay laeng nga agad-adal ti buridekna.
Inlawlawagna nga adda ti kiddaw dagiti dua nga annakna a nakaturposen iti kolehio nga agsardengen daytoy iti trabahona tapno isudan ti agbirok ken mangibaklay kadagiti magastos iti inaldaw-aldaw.
Nupay kasta, kunana nga agingga a kabaelanna pay laeng ti agtrabaho ket isuna ti mangsungbat pay laeng kadagiti amin a kasapulan dagiti annakna agingga a mapagturposna pay ti inaudi nga anakna.
Mainaig iti daytoy, kuna ni Cachero a saanna a mailadawan ti napalaos a ragsakna a makita ti in-inut a pannakagun-od dagiti annakna kadagiti arapaapda no sadino maysa kadagiti saanna a pulos a malipatan ket idi sinurpresa isuna ti anakna a nakapasa iti Civil Engineers Licensure Examination iti kallabes.
Gapu iti daytoy, inpannakkelna nga arig naminpinsan a napukaw ti amin a bannog ken sakripisiona iti las-ud ti sumurok-kumurang 30 a tawen a nagtrabaho kas bus driver.
Kabayatanna, nangibati daytoy ti adal kadagiti agtutubo iti baro nga henerasion a saan a nalaka ti agasawa, saan a kaskarina ti agbalin nga ama ken saan a sinsinan ti agbukel ti bukud a pamilia gapu ta masapol ti natured a pakinakem, atiddog a pasensia ken nakasagana a panangsango kadagiti nadadagsen a responsibilidad kas padre de pamilia.
