LAOAG CITY – Nabirukanen a maysan a nalamiis a bangkay ti maysa nga ama a dua a lawasen a mapukpukaw iti Barangay Paratong iti ili ti Paoay.
Nabigbig ti biktima a ni Mr. Eric Dennis Agudong, agtawen ti 54, naasawaan ken residente ti Barangay Rioeng ditoy siudad ti Laoag.
Nasarakan ti bangkay ti biktima a nakabitin iti kayo ti mangga babaen kadagiti mapan ag-spray kadagiti mula a mangga iti oras ti 8:30 itay bigat ita nga aldaw, Enero 19.
Mainaig iti daytoy, basar kadagiti otoridad a posible nga addan ti sumurok maysa a lawasen a nakabitinen ti biktima sakbay a nakita daytoy.
Maipalagip a basar iti report, napan nag-jogging ni Agudong iti bigat ti Enero 2 iti paset ti Barangay 54-B, Camanggaan ditoy siudad ti Laoag ngem saanen a napasangpet pay ti pamiliana.
Naammoan a naudi a nakita ni Agudong iti Sitio Lusong iti Barangay Camanggaan iti oras ti alas-6:30 ti bigat iti dayta met laeng nga aldaw.
Kabayatanna, ni Agudong ket nakaugaliannan ti regular a mapan ag-jogging iti agsapa iti asideg ti Padsan River.
Immuna iti daytoy, inpakaammo ti anak ni Agudong nga idi 2022 ket na-diagnose ti amana iti anxiety.
