LAOAG CITY – Nasakit ti nakem ti maysa nga ama a ni Wilfredie Asis kalpasan a maipagarup a binekkel ti ipagna a ni Aileen Asis ti anakna a ni Kathleen Asis iti Barangay Dariwdiw iti siudad ti Batac.
Segun ken ni Wilfredie, napan daytoy nagpa-load iti maysa a tiangge tapno tawagan koma ti anakna nga adda idiay Cagayan ngem saan met laeng a naka-load gapu ta naibusan ti load ti tiangge a napananna.
Gapu iti daytoy, apaman a nagsubli ni Wilfredie iti pagtaenganda ket pinagsaosaoan isuna ti kabsatna a ni Benhur ti agkakadakes a sarita.
Inbatadna a nakapungtot daytoy isu a napan nangala ti buneng gapu ta dumarup ti kabsatna ken ti ipagna.
Mainaig iti daytoy, napan naganawa ni Kathleen ket ditoy metten a maipagarup a binekkel isuna ti ikitna iti saan pay a masinunuo a rason.
Kuna ni Kathleen a kanayon nga agpangpangngeg ti uliteg ken ikitna iti pamiliada ngem saanda nga ikankano gapu ta saanda kayat ti makiriri.
Naammoan a tunggal nabartek ni Benhur ket mangriribuk iti pamilia ti kabsatna a ni Wilfredie gapu kadagiti sumagmamano a pammabasol nga awan ti kinapudnona.
Kabayatanna, inpasingked ni Barangay Chairman Frederico Ventura ti Barangay Dariwdiw iti siudad ti Batac nga aramidenna ti amin a kabaelanna tapno masolbar ti nagbaetan dagiti agkabsat nga Asis.
