LAOAG CITY – Natay ti maysa nga ama kalpasan a nagbekkel iti Barangay Capurictan iti ili ti Solsona.
Segun ken ni P/Maj. Chris Anthony Sorsano, Hepe ti Solsona Municipal Police Station, ti biktima ket agtawen ti 59, naasawaan ken residente met laeng iti nasao a barangay.
Inbatadna a nakita mismo ti maysa kadagiti annak ti biktima a nakabitinen daytoy iti puon ti salamagi.
Gapu iti daytoy, kunana nga insigida a napanna inayaban ti kabsatna tapno ibaba ti bagi ti amada.
Inlawlawagna nga adda ti problemada nga agasawa gapu ta sipod idi naoperaan ti asawa ti biktima ket saanen a nagdenna dagitoy iti maymaysa a pagtaengan.
Innayonna nga agatiddog ti maysa agingga lima a metro ti tali nga inusar iti panagbekkel ti biktima.
Naammoan a daytoy ti umuna a gundaway nga inaramid ti biktima a kettelen ti bukudna a biag.
Kabayatanna, naammoan nga adda ti inbati a suicide note ti biktima no sadinno a nailanad ditoy a mangnamnama isuna a naragsakton ti asawana a saannan a makita daytoy.
