LAOAG CITY – Nagpannawagan ni Mr. Marcelo Ramos, Jr., ama ti nasarakan a bangkay iti paset ti Barangay Zamboanga ditoy siudad ti Laoag a hustisia ti kiddawna iti naladingit a napasamak iti anakna.
Naamoan a ti biktima ket isu ni Jayson Ramos nga agtawen 36, awanan ti asawa, ken residente iti nasao met laeng a lugar.
Basar iti pannakisarsarita ti Bombo Radyo Laoag News Team iti ama na ket ditoy nga inyistorya a nagpakada ti anak na a mapan makiinom iti Barangay Cavit iti isu met laeng a siudad no sadinno a ditoy met ti ayan ti pagtaengan ti kabsatna.
Kunana nga apaman a mapmapan daytoy a makiinom ket awan met iti maipadpadamag a madi nga aramidna wenno awan met ti kaapa na.
Apaman a nagturong ti biktima iti nasao a barangay ket nasayaat ti arwatenna a rimuar ngem idinto ta kellaat a napasamak iti krimen ket nasarakan daytoy iti kabakiran iti paset ti Barangay Zamboanga nga awanen ti badona nudiket boxer laeng ti suot nan no sadinno a naisako pay ti ulo na.
Segun kenkuana, maladingitan daytoy gapu ta nasayaat ken nasingpet ti nasao a biktima, ket kunana a narigat a panunoten ti motibo ti napamasak nga insidente.
Patien daytoy a saan laeng a maymaysa ti akin aramid gapu ta no maysa laeng ket kabaelanna kuma nga isalakan ti bagbagina.
Inbatadna a ti nakalasinanna nga anakna daytoy ket iti tattoo ti abagana.
Kunana nga adda ti atapen da a maysa a lalaki a kasango da met laeng bayat ti panagiinomda ken mamati daytoy nga addaan ti impluwesia ti arak ti nagaramid iti nasao a pannakapapatay.
Mamati ni Mr. Ramos a namalmalo iti anakna gapu ta adda dagiti naglemma iti nagduduma a paset ti bagina ken lumlumteg iti rupana.
Mainaig iti daytoy, mamati met ti kasinsinna nga ice pick iti nausar iti nasao a krimen gapu ta napirpir ti rupana ken natukkol ti ima na a mabalin nga isu ti insanggana tapno protehiran ti bagbagina.
Innayon ni Mr. Ramos a desidido da a mangipila ti kaso no mapaneknekan ken maamoan no siasinno ti akin aramid iti naladingit nga ipupusay gapu ta kunana a nasingpet ti anakna ket saan a rumbeng a kastoy iti mapasamak kadaytoy.
Nupay kasta, iti biang ti Philippine National Police (PNP) Laoag, ket manarimaan pay laeng ti naiget nga imbestigasionda tapno maamoan ti puon ken gapu iti napasamak a krimen.
