LAOAG CITY – Nasakit ti nakem ni Mr. Reynaldo Basilio, residente ti Brgy. Bengcag ditoy siudad ti Laoag ken ama ti ubing a nadesgrasia a maipagarup a pinagsawsaw-an ti pulis ti anakna.
Segun kenkuana, manarimaan nga agpapaburbor ti motorsiklo ti anakna kabayatan ti panangsarabo ti baro a tawen ngem saanna a nakontrol ti manibela a nangitunda ti pannakadesgrasiana.
Inbatadna nga imbes a tulungan ni Pat. John Louie Barroga a kaarrubada ti anakna a nadesgrasia ket maipagarup a pinagsawsaw-anna pay ti dakes.
Inlawlawagna nga idi naitaray iti Governor Roque B. Ablan Sr. Memorial Hospital ti anakna ket ditoy a naibaga kenkuana nga inung-ungtan ken pinagsawsaw-an ti pulis ti anakna.
Gapu iti daytoy, kunana nga iti kabigatanna ket nagturong isuna iti pagtaengan ti pulis ket sinaludsodna no apay a pinagsawsaw-anna ti anakna idi nadesgrasia.
Inpalgakna a segun iti nagbalin a sungbat ti pulis kenkuana a saanna met nga ammo a ti anakna ti pinagsawsaw-anna.
Mainaig iti daytoy, desidido a mangipila ti reklamo ti ama ti ubing a nadesgrasia kontra iti nasao a pulis.
Kalikagum met ni Barangay Chairman Jojo Lorenzo, ti Brgy. Bengcag ditoy siudad ti Laoag a maikkan ti pagmennamennaan ti pulis gapu iti inaramidna.
Kuna ti Kapitan a saan laeng a daytoy ti umuna a daras nga adda ti pinagsawsaw-an ti maseknan a pulis iti barangayda gapu ta adda dagiti sumagmamano a residente ti napagsawsaw-an pakairamanan ti mismo nga anakna.
Pinadas ti Bombo Radyo Laoag News Team a nagturong iti pagtaengan ti pulis ngem awan isuna ken saan met a nangipaay ti naan-anay a komento ti asawa daytoy.
Kabayatanna, naammoan a nakadestino ti pulis iti Provincial Drug Enforcement Unit ti Ilocos Norte Police Provincial Office ken manarimaan ti schooling-na nga agsubli iti trabahona inton Lunes, Enero 6.
