LAOAG CITY – Inadmitir ni Mr. Wesley Esquidillo iti Barangay 15 ditoy ciudad ti Laoag a nadiswan na ti anak na rason a nagtalaw iti pagtaengan da idi Agosto 15 ita a tawen.
Segun kenni Esquidillo, naungtan na ti anak na gapo ta arig na saan a patpayen ti ubing ti ama na ken switswitiken na daytoy.
Inpetteng na a nadangran na ti anak na gapo ta daytoy ti ammo na a wagas tapno madisiplinaan na ti nasao nga ubing.
Mainaig iti daytoy, kuna ni Esquidillo a maluksaw iti ina ti ubing gapo ta saan na a dagus nga inpakammo kenkuana nga adda kenkuanan ti anak da.
Ummuna iti daytoy, kuna ti ama nga idi nagpukaw ti anak na ket saan a nagreport a dagus iti PNP gapo ta kampante a saan nga umadayo ken nagpauyo laeng.
Maipalagip a kalpasan a naungtan ti ubing ket nagtalaw iti balay da ken nakita idiay ili ti Pasuquin sakbay a napan idiay Tuguegarao City nga isu ti ayan na iti agdama.
Kabayatanna, inlawlawag ni Mrs. Evangeline Adducol, ina ti ubing a saan na a dagus nga inpakammo kenni Esquidillo gapo ta kiddaw daytoy ti anak na.
Segun kenn Adducol, iti agdama ket adda iti nasayaat a kasasaad ti anak na ngem naulimek laeng no dadduma gapo iti maipagarop a pannakadangran na babaen ti ama na.
Inbatad na a basar ti palawag ti anak na ket kanayon a madangdangran ngem saan nga agipulpulong iti ina na gapo ta maipagarop a butbutngen ti ama na.
Naglikudan pay ni Adducol a cellphone laeng ti iggem ti ubing gapo ta tumultulong met kadagiti trabaho iti uneg ti balay.
Kunana a naamoan na nga adda idiay ili ti Pasuquin kalpasan a timmawag ti maysa a kagawad kenkuana ken nangipatulod ti kwarta a plete ti ubing a napan idiay Tuguegarao City.
