LAOAG CITY – Nasugatan ti ulo ti maysa a lalaki kalpasan a tinagbat ti ama na idiay Brgy. Bobon, iti ili a Burgos.
Nabigbig ti biktima a ni Edwin Lagcapan Jr. agtawen ti 35, awanan asawa, laborer, idinto a ti suspek ket ni Edwin Lagcapan Sr. agtawen ti 61, laborer agpada a residente ti nasao nga ili.
Segun ti PNP Burgos, naaddaan ti nabara a diskusyon dagiti agama bayat nga adda da iti balay da.
Gapu iti daytoy, nangala ti ama ti buneng ken intagbat na iti anak na rason a nasugatan ti ulo daytoy.
Insegida a naitaray ti biktima iti Bangui District Hospital.
Natiliw met dagiti otoridad ti suspek agraman ti nausar a buneng.
Naamuan a nakainom dagiti agama idi nasapamak ti panagriri da.
Maisagsaganan ti maipila a reklamo kontra ti ama kalpasan ti insidente.
