LAOAG CITY – Natay ti maysa nga ama kalpasan a nagbekkel usar ti tali iti uneg ti balay da iti Barangay Naglicuan, Pasuquin, Ilocos Norte.
Binigbig ni Mr. Cesar Agbayani, katugangan ti biktima a ni Dondie Borromeo, agtawen ti 29, maysa a mannalon ken residente iti nadakamat a barangay ken tubo iti ili ti Burgos.
Segun kenni Agbayani, sakbay a nagpakamatay ti manugang na ket naamoan na nga adda ti saan a nagkinnaawatan ti biktima ken ti asawa na nga adda iti ballasiw taaw ken inpetteng na a kabaelan na a solbaren ti problema da nga agasawa.
Kunana a malaksid iti daytoy ket awanen ti ammo na a problema ti biktima.
Inlawlawag ni Agbayani a ti laeng ammo na ket kalikagom ti asawa ti biktima nga istimaren na dagiti tallo nga annak da.
Innayon na a nadiskubre na a nakabitin ti biktima itay bigat gapo ta agbalaw da a saan a rumwar.
Kabayatanna, Inpasingked ni Police Lt. Jimmy Aganon, deputy chief of police ti PNP-Pasuquin nga awan ti nakita da a foul play iti pannakatay ti biktima.
Innayon ni Aganon na a ti maysa kadagiti makitkita da a rason ket kayat ti asawa ti biktima nga adda idiay Jordan nga agsina dan.
