LAOAG CITY – Saan a ti ambulance fee ti agbalin a lapped tapno saan a maitaray wenno maiyakar iti dakdakkel nga ospital ti maysa a pasyente.
Daytoy ti inbatad ni Dr. Rogelio Balbag, Hospital Executive Director ti Ilocos Norte Hospital and Management Council kalpasan nga adda ti dimmanon ditoy Bombo Radyo Laoag a reklamo seknan iti saan a pannakaitaray ti pasyente nga ubing iti Gov. Roque Ablan Sr. Memorial Hospital manipud iti Dingras Disrtict Hospital.
Basar iti reklamo, intaray da ti maysa nga ubing iti Dingras Disrtict Hospital babaen iti tricycle ken idi nakadanon dan iti ospital ket nabalakadan dagitoy a maiyakar iti Provincial Hospital.
Nupay kasta, kunana a ti ammo da ket mausar ti ambulansya tapno al-alisto a maidanon ti pasyente ngem maipagarop a naibaga kadakuada a parbangon pay laeng a sumangpet ti ambulansya ken adda ti bayadan da a 500 a pisos.
Gapo iti daytoy, napilitan da a tricycle ti nangiluganan da iti pasyente tapno maidanon iti Provincial Hospital.
Mainaig iti daytoy, kuna ni Dr. Balbag nga awan pay ti dimmanon kenkuana a report seknan iti daytoy a banag ngem beripikar na iti maseknan nga ospital.
Inpetteng na nga iti baet nga adda iti revenue code ti fees kasukat dagiti serbisyo nga ipaay ti ospital, ti saan ambulance fee ket saan met nga inkapilitan a bayadanen nangruna no awan laeng ti naitugot dagit maseknan ken ti kondisyon ti mismo a pasyente nangruna no emerhensya daytoyen ken kasapulanen a maiyakar iti dakdakkel a pasilidad.
Inpalgak na a masapol a maitaray wenno maiyakar ti pasyente adda man wenno awan ti bayad na.
Kunana a no adda ti mapaneknekan nga iyun-una pay laeng dagiti maseknan ti agbayad ti ambulance fee sakbay nga itaray ti pasyente ket mabalin a mapatawan ti pannusa.
Kabayatanna, inbatad ni Dr. Balbag nga amin nga ospital nga adda iti babaen ti gobierno probinsyal ket adaan ti ambulansya.
