LAOAG CITY – Naarestar ti maysa nga ambulant vendor iti Anti-Illegal Drug Buy-bust Operation iti Barangay Santiago iti ili ti Solsona.
Ti suspek ket maysa a lalaki, agtawen ti 41 ken residente ti Barangay 16 ditoy siudad ti Laoag.
Segun ken ni P/Cpt. Randy Damo, Hepe ti Solsona Municipal Police Station, natiliw ti suspek kalpasan a naglako ti maipagarup a shabu iti police poseur-buyer.
Inbatadna nga agdagsen ti dua a gramo a maatap a shabu ti naala dagiti otoridad manipud iti suspek.
Inlawlawagna a mabalin nga iragragpin ti suspek nga aglaklako kadagiti balloons ti panagilakona ti iligal a droga.
Kunana nga agturturong ti suspek kadagiti nagduduma nga ili a mangisaysayangkat ti fiesta tapno aglako kadagiti balloons.
Inpettengna a manarimaan ti pannakikoordinarda iti Laoag City Police Station para iti naan-anay pay nga impormasion maipanggep iti pakabigbigan ti suspek.
Innayonna a maibilang ti suspek kas newly identified drug personality.
