LAOAG CITY – Kalikagum a mapawilan dagiti ambulant vendors ken sari-sari store owners iti bisinidad ti Cabeza Elementary School ditoy siudad ti Laoag.
Daytoy ti inendorso ni Vice Mayor Rey Carlos Fariñas a surat a naawatna manipud iti nasao a pagadalan iti Sangguning Panlungsod.
Inbatadna a ti nasao a surat ket manipud mismo iti School Principal a ni Mr. Joel Remigio.
Inlawlawagna a nakailanad iti surat ti panangkiddaw iti konseho iti pannakaputar ti ordinansa a mangipawil kadagiti ambulant vendors ken sari-sari store owners iti bisinidad wenno 5 meter radius iti nasao a pagadalan.
Kunana a daytoy ket gapu iti saan a nasalun-at a taraon a mabalin a gatangen dagiti agad-adal.
Mainaig iti daytoy, inpakaammo ni Vice Mayor Fariñas a saan a sigurado ti rumbeng nga armiden ti konseho maipanggep iti daytoy gapu ta dagiti maseknan nga aglaklako ket isu met ti pagsapulanda.
Gapu iti daytoy, inendorso ni Fariñas iti nasao a banag iti Quad Committee a bukbuklen ti Committee on Health, Education, Laws ken Trade and Industry.
