LAOAG CITY – Nasuspenso ti amin a flights a rummuar ken sumrek iti Reagan National Airport idiay Estados Unidos.
Daytoy ket para iti naig-iget nga imbestigasion seknan iti panagsuek ti maysa a passenger jet iti Potomac River idiay Washington kalpasan ti panagdinnungparda iti tangatang ti maysa a military helicopter nga asideg iti Reagan National Airport.
Segun ken ni Bombo International News Correspondent Rene Ballenas manipud idiay Estados Unidos a naipakaammo dagus daytoy nga insidente ken ni United States President Donald Trump.
Nupay kasta, awan pay ti impormasion maipapan iti bilang dagiti tattao a nakalugan iti eroplano wenno no adda ti pimmusay.
Inbatadna a ti Bombardier regional jet a nairaman iti insidente ket addaan iti kapasidad nga agingga iti 78 a pasahero.
Inlawlawagna nga inbilin ti Federal Aviation Authority (FAA) ti temporario a grounding ti amin nga eroplano iti Reagan National Airport.
Kunana a gapu iti nasipnget a situasion, nakikadua dagiti fireboat iti recovery operation ket nakita dagiti trak ti bumbero nga agturong iti eropuerto.
Innayonna a naggapu ti eroplano manipud Wichita, Kansas. Ti PSA Airlines ket maysa a subsidiario ti American Airlines. Ti Sikorsky H-60 a pagaammo met kas Blackhawk ket addaan iti kapasidad nga agingga iti 15 a tattao, agraman dagiti tripulante.
Mainaig iti daytoy, pinasingkedan ti embahada ti Pilipinas idiay Washington DC nga awan ti naawatda a report a mangipasimudaag nga adda dagiti Pilipino ti nakalugan iti jet.
Kabayatanna, naammoan a ti American Airlines ket addaan ti 60 a pasahero ken uppat a tripulante a naglugan iti eroplano a nagsuek kalpasan ti panagdinnungpar iti tangatang nga asideg ti Reagan Airport.
