LAOAG CITY – Inpakaammo ni Miss Ma. Joreina Therese Blanco, Information Center Manager ti Philippine Information Agency wenno PIA – Ilocos Norte nga ubing pay laeng ket arapaapna daytoyen nga agbalin a mannurat wenno agirakrakurak.
Segun kenkuana, ti nagbalin nga inspirasionna ket ti ikitna a maysa met a mannurat iti maysa a newspaper agency ditoy pagilian.
Inbatadna nga iti kanito a makitana ti nagan ti ikitna iti printed newspaper ket mariknana a dakkel a dayaw daytoy kas maysa a mannurat.
Gapu iti daytoy, kabayatan a dumakdakkel ken naaddaan ti nakem ket naammirisna a kalikagumna met ti agbalin a mannurat iti masakbayan nangruna ket nakitaanna ti bagbagina nga adda ti potensialna iti writing skills.
Kunana nga idi timmapog daytoy iti sekondaria ket pinadasna ti agaplikar wenno ag-audition iti maysa nga school paper publication.
Inyestoriana a saanna a ninamnamana nga ikabilda isuna iti Filipino kas medium iti panagsurat gapu ta ad-adda nga Ingles ti us-usarenna iti panagsurat rason a nagbalin a dakkel a karit kenkuana daytoy.
Mainaig iti daytoy, inburay ni Miss Blanco a nagbalin a contestant isuna iti Division Schools Pressconference no sadinno a naikabil isuna iti Editorial.
Nupay kasta, nadismaya isuna kalpasan a saan a nakastrek iti nasao a pasalip.
Inlawlawagna a daytoy met ti nangipasimudaag kenkuana nga adu pay ti nasken a masursurona babaen iti saan a panagsarday kadagiti pannubok a sangsangoenna a pakapidotanna ti adal.
Innayonna a nangrugi isuna kas Job Order iti Philippine Information Agency agingga a nagbalin daytoy nga Information Center Manager iti agdama.
Kabayatanna, naammoan nga adu ti nagaplikaran ni Blanco pakairamanan dagiti agkakadakkel a kompania idiay Manila ngem saan a naituding para kenkuana.
