LAOAG CITY – Mangiparuk-at ti Anti-Money Laundering Council (AMLC) ti ad-ado pay a freeze order kontra iti assets ken bank accounts dagiti karaman iti maanomalya a flood control projects.
Segun ken ni Anti-Money Laundering Council executive Director Matthew David, saan pay a nalpas ti konseho gapu ta agtultuloy paylaeng ti imbestigasyon da kadagiti mapagduduwaan nga account.
Kuna na nga adda ti namnamaen a baro a freeze orders ngem saan pa a sigurado no dagitoy ket maiparuk-at ita a lawas wenno iti sumaruno a lawas.
Iti laeng kallabes ket naiparuk-at ti maikalima a freeze order, karaman ditoy dagiti bank accounts, insurance policies, motor vehicles, real properties ken e-wallet accounts.
Maipalagip a nagpirma met ti konseho karaman ti binukel ni Presidente Ferdinand Marcos Jr. nga Independent Commission on Infrastructure (ICI) iti maysa a katulagan tapno papigsaen pay ti kooperasyon dagiti ahensiya ti gobierno iti panagtultuloy ti imbestigasyon dagiti maanomalya a proyekto.
