LAOAG CITY – Naka-secure ti Anti-Money Laundering Council (AMLC) ti maikainem a freeze order manipud iti Court of Appeals (CA) kontra kadagiti sanikua dagiti karaman iti maipagarup a maanomalya a flood control projects.
Sakupen daytoy ti 39 a bank accounts, uppat nga insurance policies ken 59 a real estate properties pakairamanan ti residential, commercial ken agricultural assets.
Basar iti Anti-Money Laundering Council, sumagmamano kadagitoy ket konektado iti maysa a dati a nangato nga opisial ti gobierno a mapagat-atapan nga addaan ti dakkel a papel iti procurement process dagiti kuestionable a kontrata iti flood control projects.
Manipud iti umuna a lima a freeze orders, naipatungpalen ti Anti-Money Laundering Council ti panag-freeze iti 1,671 a bank accounts, 58 nga insurance policies, 163 a motor vehicles, 99 a real estate properties ken 12 nga e-wallet accounts nga addaan ti pakabuklan a balor a ₱4.67 bilyon.
Manamnama a ngumato pay daytoy a bilang kabayatan a manaynayonan ti order ken madukduktalan dagiti baro a lead.
Manarimaan ti pannakibinnulig ti Anti-Money Laundering Council iti Independent Commission for Infrastructure (ICI), Office of the Ombudsman, Bureau of Internal Revenue (BIR) ken National Bureau of Investigation (NBI) iti panangtingiting kadagiti indibidual ken entity a dinakamat kadagiti panagdengngeg ti Senado.
Ipakpakita daytoy iti panangipasigurado ti gobierno iti nauneg ken patas nga imbestigasion.
