LAOAG CITY – Natay ti maysa nga ama kalpasan a binagkong ti bukudna nga anak iti Barangay Tabucbuc iti ili ti Marcos.
Segun ken ni P/Capt. Roi Manuel Ordonio, Hepe ti Marcos Municipal Police Station, nabigbig ti biktima a ni Pedro Tolentino Mateo, agtawen ti 79, naasawaan ken mannalon idinto a ti suspek ket nabigbig a ni Joel Pasion Mateo, agtawen ti 44, naasawaan ken mannalon nga agpada dagitoy a residente ti Sitio 6, Barangay Tabucbuc iti ili ti Marcos.
Inbatadna a basar iti inisyal nga imbestigasionda ket nabagkong iti nagduduma a paset ti bagi ti biktima a nangitunda ti pannakatayna.
Kunana a naitaray ti biktima iti Doña Josefa Edralin Marcos District Hospital ngem naideklara a dead on arrival babaen ti attending physician.
Innayonna nga iti agdama ket adda iti pagbalodan ti suspek a manamnama a sumango ti maiyannatop a pannusa.
