LAOAG CITY – Nailungalong iti Senado ti gakat a maipaayan ti karebbengan dagiti lehitimo nga anak nga usaren ti apelyido ti inada no kayatda.
Iti Senate Bill 196 nga inlungalong ni Senate Minority Leader Vicente Sotto III, dinakamatna ditoy a bigbigbigen ti estado ti ar-aramiden nga akem dagiti babbai iti nation-building ken patas a karebbengan ti babai ken lalaki iti sangoanan ti linteg.
Inbatadna a ti maysa nga isyu a nasken a solbaren ti mainaig iti apelyido dagiti lehitimo nga anak no sadinno a normal daytoy ditoy Pilipinas nga usaren ti apelyido ti ama.
Gagem ti gakat nga ilawlawag ti kinalawa ti legal right dagiti lehitimo nga anak nga usaren ti apelyido ti inada ken palubusan dagiti agasawa nga umannugot no ania nga apelyido kadakuada ti maikabil iti birth certificate.
Naammoan a no agbalin a linteg daytoy, mapalubusan ti maysa a legitimate child a sukatan ti apelyidona iti uneg ti sangapulo a tawen kalpasan ti “age of majority” a saanen a kasapulan ti approval ti korte.
Kabayatanna, maminsan laeng a daras a mabalin nga aramiden iti panangsukat ti apelyido.
