LAOAG CITY – Emosyunal nga inyistorya ni Mrs. Noren Joy Macatbag iti Barangay Sulquiano iti ili ti Dingras ti kapadasan da iti Gov. Roque Ablan Senior Memorial Hospital kalpasan ti maipagarop a saan a nasayaat a pannakaasikaso ti ina na a rason ti pannakatay na.
Segun kenni Macatbag, idi Hunyo 1 iti alas-siete ti rabii ket intaray da ti ina da iti nadakamat nga ospital ken inbatad a masapol a maideretso iti ICU.
Nupay kasta, gapo iti protocol a masapol nga adda ti health certificate manipud iti barangay ket saan a dagus a naiserrek iti ICU ti pasyente isut gapo na a napan da riniing ti kapitan ti Barangay 6 ditoy ciudad ti Laoag nga isu ti pagnanaedan na, ken iti alas-onse ti rabii ti pannakaiserrek ti ina na iti ICU.
Inlawlawag na nga iti agarop alas-kwatro iti parbangon, napan na kinita ti ina na ngem nakigtot gapo ta marigatanen ti pasyente ngem saan a makastrek gapo ta naka-lock ti ridaw iti ICU rason a tinugtog na agingga a nakariing dagiti nurses.
Nasakit ti nakem ni Mrs. Macatbag gapo ta ti maipagarop nga inbaga kenkuana dagiti nurse ket isuna ti mangpa-relax iti ina na ken saan da a dinamag no anya ti marikrikna ti pasyente.
Inbatad na nga inpakaasi na nga aramiden dagiti nurses ti amin tapno masalbar ti biag ti ina na ngem maipagarop nga inayaban da laeng ti doktor idi awanen ti anges ti ina na.
Inadmitir ni Mrs. Macatbag a saan na nga ammo a kasapulan ti health certificate sakbay a makastrek iti ospital.
Naamoan nga adda ti bimmara nga urat iti puso ti ina na ken nabayagen a paspasaren na daytoy ken no agtumar ti agas ken agkalma ngem iti dayta nga aldaw ket narigatan.
Mainaig iti daytoy, desidido ti pamilya Macatbag a mangipila ti reklamo kontra iti ospital gapo iti napasamak iti ina na.
Kabayatanna, saan pay a nangipaay ti komento ni Dr. Walberg Samonte, ti Hospital Administrator seknan iti daytoy a pasamak ngem inpasigurado na a mareview a nalaing ti medical records ti pasyente ken kasarita na dagiti nurses a nakaduty iti dayta a gundaway.
