LAOAG CITY – Saan a mailadawan ni Mr. Joseph Ian Baloaloa nga anak ti maysa nga Electrician kalpasan a saan laeng a nakapasa iti 2024 Licensure Examination for Teachers no di ket nagbalin pay daytoy kas Rank 10 iti nasao nga eksaminasion.
Segun ken ni Baloaloa, saanna a ninamnama a makastrek daytoy kas maysa kadagiti topnotchers iti nasao nga eksaminasion.
Inbatadna nga arapaapna laeng ket makapasa isuna tapno in-inut a magun-odna dagiti kalikagumna iti biag.
Inlawlawagna a dakkel a tulong para kenkuana ti Review Center nga ad-adda pay a naasa dagiti nasursurona iti uneg ti klase.
Kunana a nakigtot daytoy gapu ta agsasaruno dagiti tawag a maaw-awatna a mangkabkablaaw kenkuana nga isuna ket saan laeng a nakapasa no di ket nagbalin pay a topnotcher.
Inbagana a doble ti napalaus a ragsakna kalpasan a nakapasa met ti girlfriend-na a ni Ms. Jesa Mae Ibuyat iti nadakamat nga eksaminasion.
Mainaig iti daytoy, inpakaammo ni Baloaloa a nagsardeng daytoy a nagbasa iti kina-abogasya tapno matutukanna ti panagrebyuna iti Licensure Examination for Teachers.
Nupay kasta, kunana nga ita a nakapasan ket kalikagumna nga ituloy nga agbasa iti kina-abogasya ken awan ti planona nga agtrabaho iti ballasiw-taaw.
Innayonna a ti kankanayon a panagkararag iti Dios ti maysa kadagiti kangrunaan a nangbayabay kenkuana kabayatan ti nasurok dua a bulan a panagrebyuna.
Kabayatanna, naammoan a ni Mr. Baloaloa ket taga Brgy. Malasin iti ili ti Bangui ken nagturpos kas Magna Cum Laude iti kurso a Bachelor of Science in Secondary Education Major in Mathematics iti Mariano Marcos State University – College of Teacher Education.
