LAOAG CITY – Nakataray ti subject ti drug buy bust operation nga inyuswat dagiti kameng ti PNP-Dingras ken PNP-Laoag idiay Barangay Medina, Dingras, Ilocos Norte.
Nabigbig daytoy a ni Mahnoel Ofilas Revilla alyas LL, agtawen ti 37, naasawaan, anak ni Barangay Chairwoman Tomasa Revilla iti nasao a barangay.
Basar ti nagbalin a police pusuer buyer a kameng ti PNP-Laoag, idi maiyawat ti buy bust money a sangaribo a pisos ken maysa a plastic sachet a maipagarop a naglaon ti shabu ket nadlaw na a pulis daytoy isut gapo na a naglibas kadwa na ni Mark Edison Daoang, residente iti nadakamat a barangay.
Basar ti PNP, bayat a nagtaray ti subject ket inpurwak na ti maysa a pouch a naglaon ti kaha ti sigarilyo nga addaan ti walo a babassit a sachet a maatap a naglaon ti shabu, maipagarop a residue, tallo a lighter, ken drug paraphernalia.
Kinumpirmaran met ni Barangay Kagawad Rodolfo Balaqui a maysa a drug surenderee ni Revilla.
Rumrumwar a ti Revilla ket aglaklako pay ti maipagarop a droga ditoy ciudad ti Laoag.
Manamnama met a mapila ti kaso kontra kadagiti subject ti operasyon.
Mainaig iti daytoy, naiget a kinontra ni Mrs. Rely Revilla, asawa iti Barangay Medina, iti ili ti Dingras ti nagbalin nga operasyon nga inyuswat ti PNP-Laoag ken PNP-Dingras.
Saan a patyen ti babai a Revilla a naglako ti asawa na ti droga gapo ta kanayun nga agpakada kenkuana no sadinno ti papanan na.
Inpetteng na nga inpabasol da laeng iti asawa na dagiti naala nga ebidensya gapo ta saan a masansan a rumrumwar.
Inbatad na a sipud simmuko iti PNP ken saanen a nagusar ken kunana nga ammo na no agus-usar wenno saan ti droga ti maysa a tao.
Agpapan maisursurat ti damag ket saan na pay a nakasarita ti asawa na kalpasan a naglibas.
Kabayatanna, awan ti ammo ni Barangay Chairwoman Tomasa Revilla iti Barangay Medina iti ili ti Dingras nga aglaklako ti iligal a droga ti anak na a ni Mahnoel Revilla, ti subject ti drug buy bust operation.
Segun iti kapitan, saan na pay a nakasarita ti anak na kalpasan a naglibas.
Inbatad na a no apaman a makita na ti anak na ket plano na met laeng nga isuko tapno maipadalan iti husto a proseso ken madeterminar no pudno ti alegasyon kontra iti daytoy.
Kunana nga idi nakagradwar sipud simmuko ket nagtalna ti anak na ken awan ti iligal nga aramid na.
