LAOAG CITY – Maluksaw ni Mrs. Rodalyn Saguso, agdama nga adda idiay Hong Kong ken residente iti ili ti Bangui iti maipagarop a panangibabawi ni Police Sergeant Rolly Ramoran Jr. iti PNP-Bangui ti facemask nga ited na kuma iti ama na a nasita gapo iti saan na a panagisuot ti facemask.
Segun kenni Saguso, naisyuan ti ticket ti ama na gapo ta saan a nagusar ti facemask, ngem kalpasan ti panagpicture da ti pulis ken ti lakay ket maipagarop nga inbabawi ni Ramoran ti facemask.
Kunana a gapo iti luksaw na ket dagus a nagpost iti Facebook ken kalpasan daytoy ket naamoan na nga inbabawi ti pulis ti facemask gapo ta inbaga ti kadua na nga amangan no narugit wenno nausaren.
Patien ni Saguso a gapo iti daytoy ket ti laeng gagem ti pulis ket ti picture a mangipakpakita ti panangiawat na ti facemask.
Kwinestyunaran pay ni Saguso no apay nga adda ti tugot a facemask dagiti pulis a narugit wenno nausaren.
Kabayatanna, kuna ni Poice Lt. Christopher Pola, ti chief of police ti PNP-Bangui a basar iti palawag kenkuana ni Ramoran ket adda ti panagdudua na iti facemask isut gapo na a nagdesisyon a saan nan nga ited daytoy.
Dinakamat na pay a basar kenni Ramoran, maymayat a saan nan nga intuloy ti panangited ti facemask gapo ta nakarkaro ti epekto na no nakumpirmaran a nausar daytoy.
Inlawlawag na nga awan ti sabali nga intensyon da a pulis no diket ti panangprebentar da iti panagwaras ti virus.
Mainaig iti daytoy, nagpadespensar met ni Pola iti napasamak kageddan ti panangisigurado na a maimbestigar daytoy a banag.
