LAOAG CITY – Patien ni Engr. Alexis Castillo Alegado, Top 1 iti 2023 April Civil Engineers Licensure Examination ken tubo ti ili ti Paoay a gaget ken panagan-anus ti tulbek iti pannakagun-od ti arapa-ap.
Segun ken ni Alegado, awan iti panunot na nga idauloan na ti nasao nge eksaminasyon gapu ta makapasa laeng ti arapa-ap na.
Inadmitir na a saan a nagbalin a nalaka ti panagreview na sakbay ti eksaminasyon gapu ta adda dagiti gundaway a mabannog ken mariribokan ti panunot na iti kaado dagiti masapol a maadal.
Nu pay kasta, inbunannag na a saan a daytoy ti nanglapped kenkuana tapno ituloy na ti inturpos na a kurso agingga a naipasa na ti eksaminasyon.
Innayun na a dakkel nga inspirasyon na ti pamilya na nangruna iti ama na a maysa a mannalon ken ti ina na a labandera.
Immuna iti daytoy, kuna ni Alegado a sipud ubing ket arap-ap nan ti agbalin a civil engineer ken patien na a babaen iti daytoy ket maitag-ay na manipod iti rigat ti pamilya na.
Nagturpos ni Alegado idi a cum laude iti kurso a civil engineering iti Mariano Marcos State Univerity idi Hunyo itay napan a tawen.
Nakagun-od met daytoy ti 92.10% passing rate iti Civil Engineer Licensure Examination ken tabla da ken ni Engr. Garret Wilkenson Ching Sia a naggapo iti De La Salle University-Manila.
Kabayatanna, iti agdama ket awan met pay ti desisyon na iti posible a pagserrekan na a trabaho.
