LAOAG CITY – Naragsak nga inpannakkel ni Mr. Oscar Gamiao, School Head ti Pulangi Elementary School iti ili ti Bacarra a manipud iti maibilang nga anak isuna ti mannalon ket maysa itan nga School Head.
Daytoy ket kagiddan iti pannakaselebrar ti Happy Teachers’ Month.
Segun ken ni Mr. Gamiao, dakkel daytoy a pammadayaw iti panagbiagna nangruna ket naggapu laeng daytoy iti maysa a simple ken nakurapay a pamilia.
Inbatadna a pudno a saan a tubeng ti kinarigat iti panagbiag tapno magun-od dagiti arapaap gapu ta nagbalin nga inspirasionna dagiti amin a padasna iti biag tapno ad-adda nga igaedna ti panagadal ken makatulong iti pamiliana.
Kunana nga adu a pannubok ti simmangbay iti panagbiagna sakbay a nakadanon no aniaman ti adda kenkuana iti agdama ngem saan pulos a simmuko agingga nga in-inot a nagun-odna dagiti kalikagumna iti biag.
Mainaig iti daytoy, inlawlawag ni Mr. Gamiao a kas maysa a mangisursuro ket saan laeng a maysa daytoy a propesyon no diket agbalin a tulbek iti masakbayan ti baro nga henerasyon.
Innayonna a nagserbi daytoy kas mangisursuro iti Tamdagan Elementary School, Suyo National High School, Ilocos Norte National High School ken dadduma pay nga ad-adda a naasa ti abilidadna iti panangisuro kadagiti estudiante.
