LAOAG CITY – Inbatad ni Atty. Rhowee Buergo, Top 7 iti 2019 Bar Exam ken nagturpos iti Jose Rizal University nga idi naamoan na ti resulta ti bar exam ket nagsangsangit gapu iti napalalo a ragsak na.
Segun kenkuana, nagpaot ti lima a minutos ti panagsangsangit na.
Inlawlawag na a ti kangrunaan a nang-motivate kenkuana a mangala iti kina-abogasya ket ti ama na a maysa a mannalon.
Kuna na a ti arapaap ti ama a pagbalinan na ket abogado ken daytoy met ti nagbalin nga inspirasyon na iti panagadal na agingga iti panageksamen na iti bar exam.
Innayon na a ti kanayun nga imula ti ama na iti panunot na ket mamati nga agbalin daytoy nga abogado iti masangwanan.
Napalalo met ti panagyaman ni Buergo gapu ta natungpal ti ama na a pagbalinan na.
