LAOAG CITY – Pilien ti right circle wenno makikadua kadagiti tattao a nakasagana a tumulong iti baet ti karit iti panagbiag ken pudno a mangisakit kenka.
Daytoy ti inrakurak ni Mr. Vince Agullana, owner ti Zion’s Palay & Rice Trading iti Brgy. Tarrag iti ili ti Pagudpud.
Segun kenkuana, saan a nalaka ti sumrek iti negosio gapu ta masapol ti naan-anay a tured ti pakinakem, umdas a puunan ken buyugan ti panagkararag iti Dios.
Inbatadna nga idi mangrugrugi daytoy iti negosio ket saanna a mailinged a saan a maliklikan dagiti nadadagsen a pannubok nga arig ket sannan a kabaelan pay a masolbar dagitoy.
Nupay kasta, kunana a saan a maliklikan ken malappedan ti pannakarikna ti bannog gapu kadagiti adu a pakakumikuman tapno laeng magun-od ti arapaap ken lumung-aw ti panagbiag.
Inlawlawagna a no adda dagiti kanito nga arig ket mapukawanen ti namnama ket nasken a kanayon a lagipen ken sublianan ti rason no apay a nangrugika ken no kasano ti kaadayo ti nakadanunamon.
Inbinglayna ti simple ngem napnoan ti arapaap a pamilia ti naggapoanna nangruna ket inkarigatan ti inana a single mother nga insakad isuda nga agkakabsat tapno makaturpos iti panagadal.
Innayonna a saanna a malipatan dagiti kangrunaan a nagbalin a parikot iti negosioda kas ti panangibilag kadagiti irik iti sabali pay a probinsia gapu iti masansan a panagtudtudo iti lugarda.
Naammoan a Zion’s Palay & Rice Trading ti nagan ti negosioda kalpasan nga inpanaganna iti kabsatna a ni Luke Zion nga isu ti inspirasionna.
Kabayatanna, ni Mr. Agullana ket pudno a maibaga a balligi iti panagbiag gapu ta isuna ket saan laeng a maibilang a negosiante no di ket maysa pay a Physical Therapist, Virtual Assistant ken Licensed Financial Advisor.
