LAOAG CITY – Inyistorya ti anak ti agtawen ti 77 a baket a maipagarop a covid-19 patient iti Barangay 15 ditoy ciudad ti Laoag a sakbay a naiconfine iti Governor Roque Ablan Senior Memorial Hospital (GRASMH) ket naguy-uyek, nagrugit nga adda ti kabulbulon na a dara ken naggurgurigor.
Inbaga na nga iti papanna panangipacheck-up ti ina na iti maysa a pribado nga ospital ditoy ciudad ti Laoag ket naikkan da agas, ngem saan pay a na-xray.
Gapu ta agsubli-subli latta ti gurigor ti ina na ket insubli na manen iti nasao met laeng nga ospital ket naikkan da manen ti sabali nga agas.
Nupay kasta, gapu ta madi latta ti ina na ket nagsubli iti ospital ngem gapu ta awan ti doktor ket inrefer da ida iti GRASMH ket ditoy a nadamag kadakuada no naswab test ti baket ken no siasinno ti nakapulpulapol na.
Inadmitir ti anak ti baket a saanna a naibaga a nakapulapol ti ina na ti kabagyan da a naggapo iti Seattle USA gapu ta idi pay laeng Pebrero a napasamak daytoy ket ti ammo na incubation period ti virus ket 2 laeng a lawas.
Iti pannakaiconfine ti ina na iti GRASMH ket naamoan da a nababa ti hemoglobin ken platelet na isut gapuna a sinalinan da ti dara ken platelet.
Kalpasan iti daytoy ket arigna normal manen ti kondisyon ti ina na ngem saan latta nga aglaing ti panaglamlammin na isut gapuna a sinukatan da ti antibiotic na ket ditoy metten nga agkararugit, ngem basar iti nurse ket epekto laeng daytoy ti agas.
Ngem nagpanic ti baket gapu ta kalpasan a nasalinan ti platelet ket adda ti dara iti sputum na no aguyek.
Inpakaammo ti anak ti baket nga idi martes, abril 21 kalpasan a naibaga na nga adda ti nakapulapol ti ina na a naggapo Seattle USA idi Pebrero ket inbaga da nga umakaren iti Mariano Marcos Memorial Hospital and Medical Center iti ciudad ti Batac.
Sakbay a naiyakar ti baket ket nadlaw ti ina na nga arigna ad-adaywan dagiti tattao isut gapuna a nagpanic ken nagkapsot ti panunot na.
Inpasigurado met ti anak ti baket a nabayagen nga agsaksakit ti ina na gapu ta possible a nakapsot ti resistansya na, ngem agtumtumar latta ken agimbag met latta daytoy.
Innayon na nga idi damo a na-Xray ti ina na ket naibaga kadakuada nga agsagsagaba ti pneumonia ti ina na ken ti bangir a bara na ket ado ti plema na, ngem iti naudi a pannaka-Xray ti baket ket naipakaammo kadakuada a kimmaro ti sitwasyon na.
Kabayatanna, kuna ti anak ti baket a saan da nga ammon no ania ti mapaspasamak iti ina da iti ospital iti ciudad ti Batac iti agdama ngem iti naudi a naibaga kadakuada ket nagik-ikkis ken nagpukpukkaw gapu ta possible a nagpanic kalpasan nga awan ti makita na a kadwa na ken mangasikaso kenkuana.
Kinumpirmaran ti anak ti baket nga agpada a pneumonia ti inbaga ti pribado nga ospital ken ti provincial ospital a sakit ti ina da, ngem ti naudi nga ultrasound na ket nakita da nga adda ti bato iti gallbladder na.
Mainaig iti daytoy, pinaneknekan ti anak ti baket ti inparuk-at nga statement ni Governor Matthew Marcos-Manotoc mainaig iti nakatayan dagiti tallo a nakadwa ti ina na iti nagyanan na a ward.
Inbaga na a dagiti pimmusay a kadwa ti ina na iti ward iti GRASMH ket agpapada da nga addaan ti nakana a sakit.
Gapu iti daytoy, immapela ti maseknan a saan koma nga unaan ti resulta ti swab testing ti ina na ken ikararagan koma ida a negatibo ti covid-19 ti nasao a pasyente.
Kiniddaw na pay iti ospital nga ayan ti ina na iti agdama nga asikaswen da koma daytoy a naimbag.
Saan a nalapdan ti anak ti suspected covid-19 patient ti nagbalin nga emosyonal iti panangibaga na nga awan ti basol ti ina na iti pannakatay dagiti tallo a kadwa na iti ward iti GRASMH.
