LAOAG CITY – Inbatad ni Atty. Jesus Agbayani, ti mangidadualo iti National Commission on Indigenous People (NCIP) ditoy probinsya a napateg a maprotehiran ti ancestral domain dagiti IPs.
Segun kenni Agbayani, ti kangrunaan a gagem ti NCIP ket tapno maipasigurado a maprotehiran ken marekognisar ti ancestral domain dagiti IPs.
Inlawlawag na dagiti daga dagiti IPs ti kaadoan kadagiti maserserrek babaen iti development projects nangruna ket nabakbang ti daga ti IPs iti natural resources.
Inpalgak na a no saan a maprotehiran ti karbengan dagiti IPs, dakkel nga epekto kadakuada nangruna no ma-displaced da gapo ta adda ditoyen ti pagbiagan da, ken magundawayan ti karbengan dagitoy.
Mainaig iti daytoy, kuna a tapno maprotehiran ti ancestral domain dagiti IPs ket adda dagiti programa ti NCIP kas iti pannakarehistro daytoy ken pannaka-isyu ti Certificate of Ancestral Domain Title (CADT).
Nupay kasta, inadmitir na a nabayag daytoy gapo ta kasapulan ti ado a proseso ken dakkel a kantidad ti mausar.
Ditoy Ilocos Norte, kunana nga adda ti dua a programa a maipatpatungpal kas iti Recognition of the Ancestral Domain iti Adams ken ti Issuance of Certificate of Recognition iti Isneg Imalawa iti ili ti Vintar.
Mainaig iti daytoy, kunana nga adda man wenno awan ti Certificate of Ancestral Domain, nagtalinaed a rekrekognisaren ti linteg dagiti daga kas Ancestral Domaing by virtue of Native Title.
