LAOAG CITY – Inrakurak ni three-time Grand Slam champion Andy Murray nga agretiron daytoy kalpasan ti 2024 Paris Olympics.
Iti online account-na, nag-post isuna ti panagyaman iti Great Britain gapu iti panangibagina iti sumagmamano a daras iti Olympics.
Innayonna nga apaman a malpas ti Paris Olympics ket ditoy nga isardengnan ti 19 a tawen a panagay-ayamna.
Maipalagip a napilitan a simmanud daytoy iti Wimbledon singles gapu ta saan pay a naimbag ti spinal cyst procedure-na.
Nakipaset isuna ti doubles kaduana ti kabsatna a ni Jamie Murray ngem napaayda iti umuna a round.
Naammoan a ti dati a world number 1 ket isu ti nakaburak iti 77 a tawen nga awan ti nagballigi iti British men’s single idi nagkampeon daytoy iti Wimbledon idi tawen 2013 ken nagbalin a nagballigi iti All England Club idi 2016.
Nakagun-od ti dua a balitok a medalya iti Olympics para iti Great Britain nga iti umuna ket idi 2012 idi abakenna ni Roger Federer iti straight sets ken kalpasan ti uppat a tawen nangabak met daytoy kontra ken ni Juan Marin del Potro.
