LAOAG CITY – Adda ti maipasdek nga Annex Campus ti Mariano Marcos State University iti ili ti Nueva Era.
Daytoy ti naragsak nga inpakaammo ni Mayor Aldrin Garvida iti nasao nga ili kalpasan nga inprubaran daytoy ti Commission on Higher Education (CHED).
Segun ti mayor, kiniddaw na a maaddaan ti extension campus ti Mariano Marcos State University iti ili ti Nueva Era para kadagiti kurso a Ladderized Industrial Technology kas ti construction, Information Technology, Food Processing ken ti College of Forestry.
Mangnamnama ni Mayor Garvida a mangrugin daytoy iti School Year 2026-2027, no sadinno a kabayatan ti panangiyur-uray ti pannakaipasdek ti extension campus ket ti paylaeng extension class ti maiyuswat.
Innayon na nga iti Nueva Era National High School ket adda dagiti classroom nga available a mabalin nga usaren para iti maiyuswat nga extension class ti Mariano Marcos State University.
Inpakaammo ti mayor a ti lote a pakaipasdekan ti Annex Campus ti Mariano Marcos State University iti ili ti Nueva Era ket indonar ti munisipyo ti nasao nga ili.
Kuna pay ti mayor a gagem ti panagkalikagom na nga adda ti maipasdek nga annex campus ti nasao nga unibersidad iti ili ti Nueva Era ket tapno masigurado nga ad-ado dagiti agtutubo iti nasao nga ili ti makaturpos iti kolehiyo uray dua laeng a tawen ti alaen da a kurso.
