LAOAG CITY – Inlawlawag ni Sangguniang Bayan Member Raprap Parado, iti ili ti Solsona a saan pay a naaprobaran ti budget ti nasao nga ili gapu ta kalikagum da a maamuan ti pakaikabilan dagiti pondo.
Inbatad na a maikkan da kuma iti gundaway a mangadal a naimbag ti naisumitir nga annual investment plan iti konseho.
Segun kenni Parado, adu kuma kadagiti konsehal ti saan a nangaprobar iti panangitantan wenno panagi-recess na ti pannakaaprobar ti budget.
Nabayagen a nalpas ti eleksiyon rason nga awan ti panagpulitika a mapaspasamak ngem ketdi panagkaykaysa para iti umili.
Mainaig iti daytoy, inbunannag ni Parado nga adda dagiti nakita na a kurang kadagiti naiporsopuesto iti sumagmamano a departamento ti lokal a gobyerno.
Inbatad na nga adda dagiti departamento a saan pay a nakasungbat ken manamnama a maimbitaran da para ti panangdepensa da daytoy intono sumaruno a tawen.
Maituloy ti pannakatratar ti budget intono Enero 6, 2020.
