LAOAG CITY – Mailunglungalong ti pannakaipaay ti annual incentives para kadagiti Barangay Health Workers, Barangay Tanod ken Barangay Service Point Officers ditoy probinsia.
Segun ken ni Provincial Liga ng mga Barangay Officer Bryan John Pascua, babaen iti daytoy nga ordinansa ket maikkan ti naan-anay a tulong ken suporta dagiti maseknan nangruna ket maibilang dagitoy kas barangay appointive officials.
Inbatadna a napanunotanna daytoy nga addang gapu ta makitana met ti dakkel a sakripisio nga ipapaayda kadagiti barangay.
Kunana a nasken laeng nga adda ti maipaay nga insentibo kadagitoy manipud iti probinsia tapno saan laeng nga aggapu iti ili wenno barangay ti aw-awatenda.
Innayonna nga iti agdama ket saanda pay a masinunuo no mano ti mainayon nga insentibo gapu ta ikoordinardanto pay laeng iti Chairman ti Committee on Finance maipanggep iti daytoy a banag.
