LAOAG CITY – Inlungalong ni Senador Robinhood Padilla ti gakat a mangmandar kadagiti amin a public officials pakairamanan ti Presidente ti Pilipinas a dumalan iti annual mandatory drug testing.
Daytoy ket kagiddan ti panag-resign wenno panagikkat ni Nadia Montenegro kas Political Affairs Officer VI iti opisina ti Senador.
Iti babaen ti Senate Bill No. 1200 wenno ti “Drug-Free Government Act a gagem a maamendaran ti Republic Act 9165 wenno Comprehensive Dangerous Drugs Act of 2002 a maobligar a maaddaan ti annual hair follicle drug test para kdagiti amin nga opisial nga adda iti gobierno manipud iti lokal nga opisial agingga kadagiti nadutokan kadagiti Government-Owned and Controlled Corporations.
Malaksid iti annual drug test, magutgutigot pay dagiti kandidato a dumalan iti voluntary random drug testing iti uneg ti 90 nga aldaw sakbay ti eleksion.
Kabayatanna, no bilang agpositibo iti panagusar iti maipawil nga agas ti maysa nga opisial, mabalin daytoy nga agserbi a pangibasaran para iti kaso nga administratibo a mabalin a mangitunda iti pannakasuspenso wenno naan-anay a maikkat iti posision.
