LAOAG CITY – Naisayangkat iti kaunaan a gundaway ditoy Ilocos Norte ti “Annual Spring Migration Birding Festival” a nagpaot ti dua nga aldaw.
Segun ken ni Mr. Xavier Ruiz, Officer In-charge ti Ilocos Norte Tourism Office, naiyuswat ti nasao nga aktibidad iti panangidaulo ti Northwestern University Center of Biodiversity Conservation Registration and Ecology iti pannakikammayet ti Department of Tourism Region 1.
Inbunannagna a karaman iti nasao nga aktibidad ti gobierno probinsial ken dagiti Local Government Units a mangisaysayangkat ti birdwatching activities ditoy probinsia ken iti dadduma pay a paset ti rehion kas iti Pangasinan, La Union ken Ilocos Sur.
Imbatadna nga adda pay dagiti nadumaduma a grupo dagiti “bird watchers” a nakipartisipar ken naggapo pay dagitoy iti nagduduma a pagilian kas iti Japan, United Kingdom ken Belgium.
Inlawlawagna a bassit laeng ti nasao nga aktibidad ngem ti napateg nga adal a naipaay na ket ti pannakatagiben ti “ecosystem”.
Impalgak ni Ruiz a karaman kadagiti lugar a binisitada iti ili ti Pagudpud ket ti Pasaleng Bay ken ti Kalbario Patapat National Park ken Paoay Lake.
Kabayatanna, inpakaammo ni Ruiz a kangrunaan a gagem ti turismo ket maibilang daytoy a dakkel a tulong iti ekonomia.
Maipalagip a karaman kadagiti naiget nga itantandudu ti gobierno probinsial ket ti pannakatagiben ti aglawlaw pakairamanan ti pannakaipadur-as ti turismo ken ekonomia.
