LAOAG CITY – Nagballaag ni Fire Superintendent Roxanne Parado ti Provincial Fire Marshal ditoy probinsya a no inkaso man a matakuatan da no siasinno dagiti makin-aramid wenno siasinno ti adda iti likodan kadagiti forest fire ken grass fire a napaspasamak iti kallabes ket mabalin da a sumango iti panaglabsing iti Anti Burning Law wenno ti Republic Act 9003 ken Clean Air Act wenno Republic Act No. 8749.
Daytoy ti inpablaak ni Parado kalpasan ti napasamak a forest fire iti Barangay Manalpac iti ili ti Solsona no sadinno a nabusbos ti sumagmamano nga oras sakbay a naideklara a fire-out.
Segun kenkuana posible a Human made wenno human induced ti gapuanan ti uram sipod ta narigat a patien a natural ti naggapuananna daytoy.
Kunana a posible a ti namunganayan ti forest fire ket gapu iti panagibelleng ti adda pay laeng segged na a sigarilyo, dagiti agpanpanuruay ti asok kas iti panagala iti honey, ken dagiti agturturong iti kabanbantayan nga agsegged ti apoy ken saan da a sebseban kalpasan.
Inlawlawagna a ti forest fire ket narigat a masinunuo no ana ti naggapuanan na, nangruna ti napasamak iti ili ti Solsona no sadinno nga umabot iti 15 nga ektarya ti nadadael ti uram, ken sa laeng nagsardeng ti uram apaman a nadanon daytoy ti Karingking Falls nga isu ti nanguduan ti bantay.
Kunana a minilmilyon ti maperdi no adda forest Fire daytoy ket basar iti Department of Environment and Natural Resources no sadinno nga idi napan a tawen 2023 ket nakairekord ti probinsya ti 21 a forest fire incident.
Bayat nga iti las-od ti nakurang a duwa a bulan a napalabas iti daytoy a tawen 2024 ket adda walo a nairekord a forest fire ditoy probinsya.
Gapu iti daytoy ket naalarama ti ahensya ti Bureau of Fire Protection rason no apay a pinalagipan da manen ti publiko.
Mainiag iti daytoy ket binallaagan ni Parado ti publiko nga agbalin a naannad gapu ta saan laeng a forest fire ken grass fire ti masansan a mapaspasmak iti probisya no sadinno a masansan pay ti report seknan kadagiti balay a nauram.
