LAOAG CITY – Inbatad ni Atty. Bernie Constantino, dati nga IBP Presidente ti Laoag-Ilocos Norte Chapter a napintas ti Anti-Child Marriage Law gapo ta protehiran na ti dignidad ken kalintegan dagiti ubbing.
Segun kenni Constantino, saanen a mabalin a mapilit dagiti ubbing a makikasar ken nadagsen ti pannusa a sangwen dagiti aglabsing.
Inlawlawag na pay a naipalaon iti linteg ti pannakaipawil ti pannakidenna iti maymaysa a balay ti ubbing kasta met ti nataengan a makikabbalay iti agtawen ti 18 agpababa.
Inpetteng na nga uray nasikogan ti maysa a babai nga ubing ket saan a rumbeng nga ipilit dagiti nagannak a makiasawa.
Kunana pay a kadagiti nagannak a mangipalubos wenno mangpatunuynoy iti kalikagom ti annak da nga ubbing a makikabbalay kalpasan a simmurot iti karelasyon na ket mabalin nga agsungbat da iti nasao a linteg.
Karaman kadagiti pannusa a sangwen dagiti manglabsing iti daytoy a linteg ket mabalin a mabalod iti nasursurok ngem innem a bulan ken ti multa a 40 a ribo a pisos.
Inpalgak na pay a kadagiti empleado ti gobierno nga aglabsing iti nasao a linteg ket mabalin a maikkat iti pwesto, maibalod ken agmulta.
