LAOAG CITY – Inrubuat ti Department of Health (DOH) ti nationwide campaign iti gagem a lappedan ken kontrolen ti panagwaras dagiti lamok nga addaan ti dengue ditoy pagilian.
Inbatad ni Health Secretary Ted Herbosa a ti laeng National Capital Region, Calabarzon ken Central Luzon ti nakita nga adda ti panagngato dagiti kaso ti dengue kadagiti naglabas a lawas ngem pinili ti Department of Health a paigetan pay ti panangikagumaanda iti pananglapped ken panangkontrol ti dengue iti intero a pagilian tapno maliklikan ti panagngato ti kaso kadagiti dadduma a lugar.
Immunan a nangideklara ti Quezon City ti dengue outbreak nga adda pay walo a lugar a manamnama a mangideklara ti outbreak.
Inbatad ni Herbosa a ti deklarasion ti dengue outbreak ket makisarita iti epidemiology bureau tapno makumpirmaran no ad-adu pay ngem iti threshold.
Iti report, ti kaso ti dengue iti Quezon City ita a tawen ket ngimmato iti 2,383 a nangatngato ti 251% maidasig kadagiti kaso iti kapada a panawen iti napalabas a tawen.
Malaksid iti Quezon City, naggegeddan ti clean-up drive iti Iloilo, Antique, Aklan, Guimaras, Negros Occidental, Davao, South Cotabato, Sultan Kudarat, Lanao del Norte, Zamboanga del Sur, Misamis Oriental, Misamis Occidental, Sarangani ken General Santos City.
