LAOAG CITY – Inlawlawag ni Dr. Marsha Lou Wafan, mangidadaulo ti Laoag City General Hospital a saan a libre ti ipapaayda nga anti-rabies vaccine para kadagiti indibidual iti nasao nga ospital.
Inbatadna a salsaludsudenda kadagiti maseknan a nakagat ti aso wenno pusa no ti Laoag City General Hospital wenno ti City Health Office.
Kunana a ti economic ti enterprise ti nasao nga ospital isu a saanda a maipaay a libre ti anti-rabies vaccine.
Nupay kasta, inpasiguradona a nakasaganada a mangakomodar kadagiti umannugot nga agbayad tapno matudukan ti bakuna.
Kabayatanna, inpakaammo ni Dr. Rodrigo Catcatan, mangidadaulo ti City Health Office a ti umuna ken maikadua a bakuna ket gatangen dagiti pasiente iti ruar idinto a ti maikatlo a bakuna ket itedda a libre gapu ta agkurkurang ti suplay ti bakuna.
Immuna iti daytoy, kwinestionaran ni Sangguniang Panlungsod Member Jaybee Baquiran no apay awan ti nailatang a pundo para iti bakuna inton 2025 ngem inpasingked ni Dr. Wafan a nairamanen daytoy iti Drug and Medicine iti pundo ti Laoag City General Hospital.
