LAOAG CITY – Inpetteng ni Mrs.Janet Cony Retamal, ti mangidadaulo iti Population and Development Office iti gobierno lokal ditoy ciudad ti Laoag a saan a solusyon ti anti-teenage pregnancy bill iti umad-ado a kaso ti teenage pregnancy iti pagilian
Daytoy ti rason no apay a saan nga anamungan ni Retamal ti nailungalong nga anti-pregnancy bill iti senado.
Inpalgak na a naipalaon iti nasao a gakat ti nasapa unay a pannakaisuro ti sex education kadagiti ubbing a karaman iti curriculum da aglalo iti basic educatio.
Inpaganetget na a para kenkuana ket possible a mangitunda ti negatibo nga epekto ti nasapa unay a pannakaisuro ti sex education kadagiti ubbing gapu ta amangan no ad-adda laeng a magutigot ti rikna da a mangaramid iti sexual intercourse.
Innayon na nga iti agdama ket adda ti iwaywayat ti Population and Development Office a population education no sadinno nga isursuro da kadagiti ubbing dagiti partes ti bagida a gagangay laeng a maisuro kadakuada.
Maipalagip a naipalaon iti gakat a masapol a dagiti ubbing nga uray agtawen paylaeng ti innem ket maisuron kadakuada ti sex education, banag a kinontra met dagiti dadduma nga agpanpanday linteg.
